ჰორნერი: რიკარდოს სისწრაფე ფეტელის წასვლის ერთ-ერთი მიზეზია

Ricciardo pace 'a factor' in Vettel exit - Horner

20 დეკემბერი

„რედ ბულის“ შეფი კრისტიან ჰორნერი არ გამორიცხავს, რომ სებასტიან ფეტელის „ფერარიში“ გადასვლის ერთ-ერთი მიზეზი შესაძლოა დანიელ რიკარდოს „მოულოდნელი სისწრაფე“ იყო. ჰორნერი აღიარებს, რომ მისთვის უჩვეულოა მსოფლიოს ოთხგზის ჩემპიონის „ფერარის“ წითელ ფერებში გამოწყობილის ხილვა, რადგან მან ყველაფერს ენერგეტიკული სასმელების მწარმოებელი კომპანიის გუნდში მიაღწია.

გერმანელმა მრბოლმა მართლაც ბევრი გააოცა, როცა ოქტომბერში გამოაცხადა, რომ „რედ ბულს“ ტოვებდა. ჰორნერის ამ განცხადების მიუხედავად, საყოველთაოდ ცნობილია, რომ ფეტელი ახალი V6 ტურბო ძრავების ფანი არაა. ამას თავად „რედ ბულის“ შეფიც აღიარებს: „მას არ მოსწონს ის, რაც ფ1-ში ხდება. ამას ხმამაღლაც ამბობს. არ მოსწონს ძრავები, მათი ხმა და მანქანის მუშაობა“, - ბიბისისთან საუბრისას განაცხადა ჰორნერმა.

ის დასძენს, რომ მომავალ სეზონში „ფერარის“ ის ორი პილოტი ეყოლება, რომლებსაც ყველაზე მეტად გაუჭრდათ ახალ ძრავებთან შეგუება. „ის (ფეტელი) ძალიან გაწბილებული იყო იმით, რომ მანქანისგან იმ რეაქციას ვერ ღებულობდა, რომელსაც ელოდა. ამას თან დაერთო ისიც, რომ მისმა თანაგუნდელმა რამდენიმე რბოლა მოიგო და მასავით მაღალ დონეზე ასპარეზობდა“, - ამბობს ჰორნრი.

რიკარდმ გასულ სეზონში სამი ეტაპი მოიგო და „მერსედესის“ ტანდემის უკან, მესამე ადგილი დაიკავა. ფეტელმა კი ვერცერთი რბოლის მოგება ვერ შეძლო. ჰორნერიც სწორედ ამიტომ ფიქრობს, რომ რიკარდოს შოკისმომგვრელი გამოსვლა, შესაძლოა ფეტელის გადაწყვეტილების ერთ-ერთი ფაქტორი ყოფილიყო. ის იხსენებს, რომ მონცას რბოლისას ავსტრალიელის მიერ ფეტელის გასწრება შესაძლოა გადამწყვეტი მომენტი იყო.

„მონცას შემდეგ, ის (ფეტელი) წარმოუდგენლად გაწბილებული იყო. აშკარაა, რომ მან მალევე მიიღო გადაწყვეტილება და სინგაპურში სულ სხვა პიროვნება ჩამოვიდა. საბოლოოდ, ეს დიდი მოულოდნელობა არც ყოფილა“, - ამბობს ჰორნერი.