ფეტელი - გამანადგურებელი

Motor racing-Vettel on pole for Indian Grand Prix

26 ოქტომბერი

სებასტიან ფეტელი არის ერთადერთი პილოტი, ვინც ინდოეთის დიდი პრიზის პრაქტიკებზეც, კვალიფიკაციებზეც და რბოლებშიც, ყოველთვის ცხრილის სათავეშია. 2011 და 2012 წლებში ასე იყო და ახლა ისღა დარჩენია, სამივე პრაქტიკასა და კვალიფიკაციაზე პირველობას, ხვალინდელ რბოლაში გამარჯვებაც მიაყოლოს და ზედიზედ მეოთხე ტიტულიც გაინაღდოს. დანარჩენების რბოლა კი მისი ტრიუმფის აკომპანიმენტი იქნება...

ფეტელმა 0.752 წამით აჯობა დანარჩენებში ყველაზე სწრაფ ნიკო როსბერგს, რომელსაც 0.070 წამით ჩამორჩა ლუის ჰამილტონი. რა თქმა უნდა, სხვაობა უზარმაზარია, მითუმეტეს თუ გავითვალისწინებთ, რომ „მერსედესის“ ორივე პილოტი, ისევე როგორც ფეტელი, რბილი რეზინით ასპარეზობდა. სამაგიეროდ, მედიუმები აირჩია მარკ ვებერმა და ეს მის დროზეც აისახა - მართალია, საერთო ჯამში მეოთხე ადგილს დასჯერდა, მაგრამ თანაგუნდელთან თითქმის წამი წააგო. მედიუმები აირჩია ფერნანდო ალონსომაც და ამის შედეგია ის, რომ ესპანელი სტარტზე მერვე ადგილს დაიკავებს.

ფეტელმა თავის კარიერაში 43-ე, ამ სეზონში კი მე-7 პოული, ბუდ ინტერნეიშნლის რეკორდული დროით მოიპოვა. რბოლასაც თუ მოიგებს, ტიტული ჯიბეში ექნება. ალონსო ერთადრთი პილოტია, ვისაც მათემატიკურად შეუძლია მისთვის ამაში ხელის შეშლა, თუმცა ძნელად წარმოსადგენია, ესპანელმა დარჩენილი ოთხივე რბოლა მოიგოს ისე, რომ ფეტელმა, ვისაც წინა ხუთი რბოლა აქვს მოგებული, ათი ქულის დაგროვებაც ვერ შეძლოს. სხვათა შორის, ბუდზე წინა ორ რბოლაში, ფეტელი ყველა წრეს ლიდერობდა. მოდი და ამას და მის RB9-ს მოუგე...

კვალიფიკაცია ჩააგდო რომენ გროჟანმა, ვინც იაპონიაში გამარჯვებისთვისაც კი იბრძოდა. ფრანგი ასპარეზობას პირველივე სექტორის შემდეგ გამოეთიშა. ის ზედმეტმა თავდაჯერებულობამ დასაჯა - რბოლაში საშუალო სიმყარის რეზინით გამოვიდა და საბოლოოდ მე-17 ადგილს დასჯერდა. როცა დარწმუნდა, რომ რბილებზე უნდა გადასულიყო, უკვე გვიანი იყო... მისმა თანაგუნდელმა კიმი რაიკონენმა მე-6 დრო აჩვენა.

ინდოეთის დიდი პრიზი

კვალიფიკაცია

1. სებასტიან ფეტელი (გერმანია, რედ ბული)             1:24.119

2. ნიკო როსბერგი (გერმანია, მერსედესი)                    1:24.871

3. ლუის ჰამილტონი (ბრიტანეთი, მერსედესი)         1:24.941

4. მარკ ვებერი (ავსტრალია, რედ ბული)                     1:25.047

5. ფელიპე მასა (ბრაზილია, ფერარი)                            1:25.201

6. კიმი რაიკონენი (ფინეთი, ლოტუსი)                         1:25.248

7. ნიკო ჰულკენბერგი (გერმანია, ზაუბერი)                 1:25.334

8. ფერნანდო ალონსო (ესპანეთი, ფერარი)                  1:25.826

9. სერხიო პერესი (მექსიკა, მაკლარენი)                        1:26.153

10. ჯენსონ ბატონი (ბრიტანეთი, მაკლარენი)             1:26.487

- - - - - - - - - -

11. დანიელ რიკიარდო (ავსტრალია, ტორო როსო)    1:25.519

12. პოლ დი რესტა (ბრიტანეთი, ფორს ინდია)           1:25.711

13. ადრიან სუტილი (გერმანია, ფორს ინდია)            1:25.740

14. ჟან-ერიკ ვერნი (საფრანგეთ, ტორო როსო)            1:25.798

15. ვალტერი ბოტასი (ფინეთი, უილიამსი)                 1:26.134

16. ესტებან გუტიერესი (მექსიკა, ზაუბერი)                1:26.336

- - - - - - - - - -

17. რომენ გროჟანი (საფრანგეთი, ლოტუსი)                1:26.577

18. პასტორ მალდონადო (ვენესუელა, უილიამსი)    1:26.842

19. ჟიულ ბიანკი (საფრანგეთი, მარუსია)                     1:26.970

20. გიედო ვან დერ გარდე (ჰოლანდია, კატერჰემი)  1:27.105

21. შარლ პიკი (საფრანგეთი, კატერჰემი)                     1:27.487

22. მაქს ჩილტონი (ბრიტანეთი, მარუსია)         1:28.138