ალეზი მრბოლის კარიერას ამთავრებს

Jean Alesi Ends Motorsport Career

19 დეკემბერი

ფორმულა ერთის ყოფილმა პილოტმა, ფრანგმა ჟან ალეზიმ თავისი მრბოლის კარიერის დასრულება გადაწყვიტა. შეგახსენებთ, რომ ალეზის თავის კარიერაში, ფ1-ში მხოლოდ ერთი რბოლა აქვს მოგებული (კანადა, 1995 წელი), თუმცა პოპულარობით ჩემპიონებსაც კი ედრებოდა.

ფ1-ში ალეზის დებიუტი 1989 წელს შედგა „ტირელ-ფორდის“ ავტომობილით და მან მაშინვე მიიქცია სპეციალისტების ყურადღება. შემდეგ მან „ბენეტონში“, „ზაუბერში“, „ფერარიში“, „პროსტში“ და „ჯორდანში“ იასპარეზა. სულ 1989-2001 წლებში, ალეზიმ 201 რბოლაში მიიღო მონაწილეობა, ორჯერ სტარტი პოულიდან აიღო, 32 რბოლა დაასრულა კვარცხლბეკზე, ოთხ რბოლაში კი უსწრაფესი წრე ჰქონდა.

ფ1-ში მან ბოლოს იაპონიის დიდ პრიზზე (ჯორდანით) იასპარეზა და მისი დასრულება ვერ შეძლო. ფ1-დან ალეზიმ DTM-ში (ტურიზმის კლასში გერმანიის ჩემპიონატი) გადაინაცვლა, სადაც 2002-2006 წლებში იასპარეზა. DTM-ში ფრანგი „მერსედესის“ გუნდში იყო და მხოლოდ ოთხი რბოლის მოგება შეძლო. შემდეგ იყო სერია სპიდქარ, ლე მანის 24-საათიანი რბოლა და ბოლოს (გასულ სეზონში) ინდი 500. ამ უკანასკნელზე „ლოტუსის“ ძრავით იასპარეზა, მაგრამ სიმძლავრის ნაკლებობის გამო, თავი ვერაფრით გამოიჩინა.

პირველი წარუმატებლობის შემდეგ, 48 წლის ალეზიმ განაცხადა, რომ ინდი 500-ზე კიდევ ერთხელ ცდიდა ძალებს, თუმცა სპონსორი ვერ მოიზიდა და ამის გამო, რბოლების მიტოვება გადაწყვიტა.