„ფერარის“ აქციებზე ათმაგი მოთხოვნაა

Ferrari Valued At US$9.8 Billion In IPO, Demand Exceeds Stock Almost Tenfold

13 ოქტომბერი

„ფიატ კრაისლერის“ მთავარი აღმასრულებელი სერჯო მარკიონე ამბობს, რომ „ფერარი“ უბრალო საავტომობილო კომპანია  კი არა, ფუფუნების საგნების მწარმოებელია და შესაბამისად დაფასებას საჭიროებს. ასეც არის - მის აქციებზე შეთავაზებაზე ათჯერ მეტი მოთხოვნა არის დაფიქსირებული.

აშშ-ის ფასიანი ქაღალდების და ბირჟების კომისიამ, იტალიურ კომპანიას სიმბოლო RACE მიანიჭა. ბაზარზე გამოსატანად გამზადებულია 17.2 მილიონი აქცია, რაც „ფერარის“ აქციების ჯამური რაოდენობის 9.0 პროცენტია. აქციები ნიუ იორკის საფონდო ბირჟაზე გაიყიდება. სააგენტო ბლუმბერგის მიერ მოპოვებული ინფორმაციით, „ფერარის“ აქციების ფასის სავარაუდო დიაპაზონი 48-52 დოლარია.

აქციების ნაწილის გაყიდვის შემდეგ, „ფერარი“ სტრუქტურულად გამოეყოფა „ფიატ კრაისლერს“ და დამოუკიდებელი კომპანია გახდება. თუმცა, მისი აქციების უმსხვილესი მფლობელი ისევ იტალიურ-ამერიკული ჯგუფი იქნება. მარანელოელებს დამოუკიდებლობა 2.8 მილიარდი ევრო დაუჯდებათ. ეს თანხა მათ ვალად ჩაეთვლებათ, რასაც დროთა განმავლობაში დაფარავენ. ამ ვალის ჩათვლით, „ფერარის“ ღირებულება დაახლოებით 12 მილიარდი ამერიკული დოლარი იქნება.