„მიცუბიშის“ შემდეგი „ევო“ ჰიბრიდული იქნება

Next Mitsubishi Evo Could Be a 500 BHP Hybrid

23 ივლისი

თანაც, მისი პლაგ-ინ ჰიბრიდული დანადგარის სიმძლავრე, მინიმუმ 500 ცხენის ძალა უნდა იყოს. ამ ინფორმაციას ავტორიტეტული ბრიტანული გამოცემა „ავტოქარი“ ავრცელებს და დასძენს, რომ ამ ავტომობილით „მიცუბიში“ კონკურენციას „ნისანის“ პოპულარულ ხელმისაწვდომ სუპერქარ GT-R-ს გაუწევს.

ეს იქნება მე-11 თაობის „ევო“ და მასზე „მიცუბიში“ იმავე ტექნოლოგიას გამოიყენებს, რომელიც ახლახანს „MiEV ევოლუშნ II-ზე“ გამოსცადა, რომლითაც პაიკს პიკის რბოლაზე იასპარეზა. იმავე გამოცემის ინფორმაციით, ახალი „ევო“ კონცეპტუალური „მიცუბიში კონცეპტ RA-ს“ შთაგონებით შეიქმნება. ეს ავტომობილი იაპონურმა კომპანიამ დეტროიტის 2008 წლის მოტორ შოუზე გვიჩვენა.

„ავტოქარის“ ინფორმაციით, ამ ეტაპზე, „მიცუბიში“ მოდერნიზებულ პლაგ-ინ ჰიბრიდული ელექტრომობილის ტექნოლოგიაზე მუშაობს, რომელსაც პირველ რიგში, „ლანსერსა“ და „აუტლანდერზე“ გამოსცდის. მათზე დადებითი გამოხმაურებების შემთხვევაში, ამავე სისტემას შემდგომში „ევოზეც“ გამოიყენებს.

უკვე ცნობილია პლაგ-ინ ჰიბრიდული „ლანსერის“ ზოგიერთი მონაცემი. მაგალითად, ის ორი ელექტროძრავით (თითოეულის სიმძლავრე 80 ცხენის ძალას მიაღწევს) და ბენზინის 2.0-ლიტრიანი ძრავით აღიჭურვება. ასეთი ავტომობილის ხარჯი 100 კილომეტრზე მხოლოდ 1.8 ლიტრი იქნება.