„ფორდ ფოკუსი“ მსოფლიოს ბესტსელერია

The World's Most Popular Cars: A New Champ

24 დეკემბერი

„ფორდ ფოკუსი“ თავის სამშობლოში, ამერიკაში საუკეთესო გაყიდვებით ვერ გამოირჩევა, ბესტსელერების ათეულშიც კი ვერ შედის, მაგრამ მთელი მსოფლიოს მასშტაბით, ამ ავტომობილს, უფრო სწორედ, „ფოკუსის“ ოჯახს, ბადალი არ მოეპოვება. განსაკუთრებული პოპულარობით, ეს სპორტული ყაიდის ჰეჩბეკი აზიის (მეტადრე ჩინურ) მზარდ ბაზრებზე სარგებლობს. და ყველა ნიშანია იმისა, რომ მილიონიან ზღვარს გადალახავს. რაც მთავარია, მსოფლიო ლიდერობას „ტოიოტა კოროლას“ ჩამოართმევს.

მესამე თაობის „ფოკუსი“ ბაზარზე 2010 წელს გამოვიდა. ის ამერიკული კომპანიის ევროპული შტოს მიერაა შემუშავებული და ამერიკის და გერმანიის გარდა, ჩინეთში, ტაილანდში და რუსეთშიც აწარმოებენ. „ფოკუსი“ ამჟამად მსოფლიოს 12 ქვეყანაში იყიდება. ბაზრის კვლევაზე ორიენტირებულ კომპანია „LMC ავტომოტივის“ გათვლებით, „ფოკუსის“ გაყიდვები წელს მილიონს მიაღწევს.

„ფოკუსს“ ბევრით არც „კოროლა“ ჩამორჩება, რომლის გაყიდვების სავარაუდო მოცულობაც 966 ათასს მიაღწევს. სწორედ ამ ავტომობილის დიდი დამსახურებაა ის, რომ მალე „ტოიოტა“ მსოფლიო ლიდერის საპატიო წოდებას დაიბრუნებს, რომელიც შარშან „ჯენერალ მოტორსს“ დაუთმო. ამ უკანასკნელს ამჯერად მეორე ადგილს „ფოლკსვაგენი“ ეცილება.

წელს მთელს მსოფლიოში 80 მილიონი ავტომობილის გაყიდვაა ნავარაუდები. ყველაზე დიდი ბაზარი კი ისევ ჩინეთია, რომელიც პირველობას ალბათ აღარავის დაუთმობს. სწორედ ჩინურ ბაზარზე გაყიდვების მოცულობა მოქმედებს ამათუიმ მოდელის წარმატებულობაზე. „ფოკუსი“ ჩინეთში ერთ-ერთი ყველაზე მოთხოვნადი ავტომობილია. სამაგიეროდ, რამდენიმე თვეა, ჩინელები იაპონურ ავტომობილებს არ სწყალობენ, რისი მიზეზიც, ამ ორ ქვეყანას წარმოქმნილი ტერიტორიული უთანხმოებაა. ამიტომ, იქ „კოროლას“ გაყიდვები მოსალოდნელზე 25 პროცენტით ნაკლები იქნება.

მსოფლიოს ბესტსელერთა მოწინავე ათეულში 9 კომპაქტური და სუბკომპაქტური ავტომობილია. ამ მხრივ ათეულში ერთადერთი საშუალო ზომის ავტომობილია სედანი „ქემრი“, რომელიც უკვე წლების განმავლობაში, არავის უთმობს ამერიკის ყველაზე პოპულარული სედანის წოდებას.

აღსანიშნავია, რომ ათეულში „ფორდს“ ორი ავტომობილი ჰყავს (მეორე ფიესტაა), „ტოიოტასაც“ ორი. სამი ავტომობილით კი „ფოლკსვაგენია“ (ჯეტა, გოლფი და პოლო) წარმოდგენილი.

2012 წლის 10 ყველაზე პოპულარული ავტომობილი

ფორდ ფოკუსი                    1 000 000

ტოიოტა კოროლა               966 000

ფოლკსვაგენ ჯეტა              822 000

ჰიუნდაი ელანტრა              777 000

ფორდ ფიესტა                     728 000

ფოლკსვაგენ გოლფი          726 000

ტოიოტა ქემრი                    705 000

ფოლკსვაგენ პოლო            704 000

შევროლე კრუზი                 694 000

ჰონდა სივიკი                      638 000