ჰამილტონი ბრაზილიის პოულზე

Hamilton on pole in Brazil, Vettel fourth

24 ნოემბერი

სეზონის ბოლო პოულ პოზიცია ლუისზლუის ჰამილტონმა მოიპოვა. პირველ რიგში კი „მაკლარენის“ პილოტები დაიკავებენ. თუმცა, ბრაზილიური ეტაპის ორ მთავარი პერსონაჟი სულ სხვაა - სებასტიან ფეტელი ამჯერად მეოთხეა. ეს ის ადგილია, რომლის დაკავების შემთხვევაშიც, გერმანელი ზედიზედ მესამე ტიტულს მოიპოვებს. ფერნანდო ალონსო კი ისევ ათეულის უკანა ნაწილშია. მერვე სასტარტო ადგილი ის პოზიცია არაა, საიდანაც ესპანელს რაიმეს იმედი შეიძლება ჰქონდეს.

თუმცა ისევე როგორც ოსტინში, ესპანელმა წინსვლა რბოლის სტარტამდე დაიწყო - 10 ადგილით დაჯარიმდა პასტორ მალდონადო, რომელმაც კვალიფიკაციის მეორე ნაწილის შემდეგ, აწონვის სავალდებულო პროცედურა არ გაიარა. არადა, მას მე-6 შედეგი ჰქონდა... ალონსოს წინ ფელიპე მასაცაა, მაგრამ ოსტინის ისტორიას თუ გავიხსენებთ, იმაზე დაეჭვებაც კი არ ღირს, რომ „შინაურ“ წინაღობას ესპანელი იოლად გაივლის. მსგავსი სიტუაცია ფეტელსაც აქვს - მის გვერდზე და ოდნავ წინ, თანაგუნდელი მარკ ვებერი დგას, რომელსაც როგორც წესი, სტარტი არ უვარგა. და ესეც რომ არა, იმის იმედი ნურავის ექნება, რომ ის ფეტელს პრობლემებს შეუქმნის. თუმცა, გერმანელი კვალიფიკაციით კმაყოფილია და ირწმუნება, რომ რბოლაში უფრო მეტისთვის იბრძოლებს...

ეს კიდევ არაფერი: ჯერ ერთი, რბოლის დისტანცია 300 კილომეტრზე მეტია და დაზღვეული არავინ არაფრისგან არაა. მეორეც, რბოლისთვის წვიმაა ნავარაუდები, რაც ბევრ რამეს აურევს და მერე ყველანი საკუთარი ოსტატობის გარდა, იღბლის იმედზეც იქნებიან. წვიმაზე „მაკლარენის“ შეფმა მარტინ უიტმარშმა განაცხადა, ცას მაშინ ავხედავ, როდესაც სასტუმროდან გამოვალო. არც ისაა გამორიცხული, რომ ამინდის პროგნოზი არ გამართლდეს...

სხვათა შორის, კვალიფიკაციაზეც ძლიერი წვიმა იყო მოსალოდნელი. რბოლის დაწყებამდე გაწვიმდა კიდეც, მაგრამ მალევე გადაიღო და მთელი სესიის განმავლობაში, ასფალტი აღარც დაუსველებია. თუმცა ერთ მოსახვევში ასფალტმა სისველე ბოლომდე შეინარჩუნა.

რბოლის პირველ ნაწილში რომენ გროჟანი პედრო დე ლა როსას დაეჯახა. ეს მაშინ მოხდა, როდესაც ფრანგი საკმაოდ ნელ მეტოქეს ბოლო მოსახვევში ასწრებდა. გროჟანმა შიდა ტრაექტორია დაიჭირა, მაგრამ ესპანელმა მოულოდნელად გზა მოუჭრა. შედეგად, მდევრის „ლოტუსს“ წინა ნაწილი დაუზიანდა. გროჟანს მანქანა სასწრაფოდ შეუკეთეს, მაგრამ მეორე ნაწილში გადასვლა მან ვეღარ მოახერხა.

„მთელი წრე პედროს უკან გავატარე, მას ლურჯ დროშებს უფრიალებდნენ. გასწრება ვცადე. მგონი, ვერ დამინახა და გზა გადამიჭრა. რაც შემეძლო დავამუხრუჭე, მაგრამ შეჯახებას თავი მაინც ვერ ავარიდე. მერე კი, სიგრილის გამო, საბურავების გახურება ვერ მოვასწარი და ეს ჩემს სწრაფ წრეზეც უარყოფითად აისახა“, - განაცხადა გროჟანმა.

ფ1-ში თავის ბოლო რბოლას მე-14 პოზიციიდან დაიწყებს მიხაელ შუმახერი.

ბრაზილიის დიდი პრიზი

კვალიფიკაცია

1. ლუის ჰამილტონი (ბრიტანეთი, მაკლარენი)            1:12.458

2. ჯენსონ ბატონი (ბრიტანეთი, მაკლარენი)                1:12.513

3. მარკ ვებერი (ავსტრალია, რედ ბული)                      1:12.581

4. სებასტიან ფეტელი (გერმანია, რედ ბული)              1:12.760

5. ფელიპე მასა (ბრაზილია, ფერარი)                            1:12.987

6. პასტორ მალდონადო (ვენესუელა, უილიამსი)        1:13.174

7. ნიკო ჰულკენბერგი (გერმანია, ფორს ინდია)           1:13.206

8. ფერნანდო ალონსო (ესპანეთი, ფერარი)                  1:13.253

9. კიმი რაიკონენი (ფინეთი, ლოტუსი)                        1:13.298

10. ნიკო როსბერგი (გერმანია, მერსედესი)                  1:13.489
11. პოლ დი რესტა (ბრიტანეთი, ფორს ინდია)            1:14.121

12. ბრუნ სენა (ბრაზილია, უილიამსი)                          1:14.219

13. სერხიო პერესი (მექსიკა, ზაუბერი)                         1:14.234

14. მიხაელ შუმახერი (გერმანია, მერსედესი)               1:14.334

15. კამუი კობაიაში (იაპონია, ზაუბერი)                       1:14.380

16. დანიელ რიკიარდო (ავსტრალია, ტორო როსო)     1:14.574

17. ჟან-ერიკ ვერნი (საფრანგეთი, ტორო როსო)           1:14.619

18. რომენ გროჟანი (საფრანგეთი, ლოტუსი)                1:16.967

19. ვიტალი პეტროვი (რუსეთი, კატერჰემი)                 1:17.073

20. ჰეიკი კოვალაინენი (ფინეთი, კატერჰემი)              1:17.086

21. ტიმო გლოკი (გერმანია, მარუსია)                           1:17.508

22. შარლ პიკი (საფრანგეთი, მარუსია)                         1:18.104

23. ნარაინ კართიკეიანი (ინდოეთი, ისპანია)              1:19.576

24. პედრო დე ლა როსა (ესპანეთი, ისპანია)                1:19.699